ආදර ප්රදී
5 වන කොටස
“ ඉතින් කියන්න , ඇයි එයා ඔයාව දාලා ගියේ “
මගේ හිස පුරා තාලෙට දුවන ඔහුගේ අතැගිලි මගේ අතින් නවතා ඔහුගේ මුහුණ දෙස බලමින් ඇසුවේ මෙවර නම් උත්තර නොදී මඟෑරින්නට දෙන්න බැරි නිසා ය.
“එයා දවසක් මම එයාට දුන්නු ඔක්කම ලියුම් , පුංචි පුංචි තෑගි ඔක්කම පාර්සල් කරල අරගෙන ආවා “
“ කොච්චර වුනත් හොඳ කෙල්ල , ගතපුවා දෙනවා “
“ ඔවු මගේ හිත ඇර “
“ හරි හරි කියන්නකො ඉතින් මොකද වුනේ ?“
“ ගෙනාපු පාර්සලේ මට දීලා ,එයා කීවා , එයා දීපුවත් එක්ක ඔක්කම පුච්චල දාන්න කියලා “
“ ඉතින් ඔයා ඔක්කම පිච්චුවා “
“ නෑ..................ඒ ඔක්කම ප්රදීට දුන්නා“
“ ඉතින් එදා වත් කීවද ඔයාව දාලා යන්න හේතුව“
“ නෑ ..... මම හේතුව දැන ගත්තෙ පස්සෙ කාලෙක යාළුවෙක්ගෙන් “
-------------------------------
ඈ ඔහු හැර ගියේ සීතල දෙසැම්බරයක වුවත් ඒ සීත කාලය පසුවෙන්නටත් කලියෙන් , ඔහුගේ විරහ සිත වේදනා වැඩි කරමින් අනූෂා යළිත් පෙමක පැටලුනාය. එයද ඔහුගේ යහළුවෙකු සමඟිනි.
ඒ වන විට නොයෙකුත් විවිධාකාර අරමුණු කරා සිත යොමු කරමින් පෑරුනු රිදුන සිත සුවපත් කර ගැනීමට මීෂා උත්සාහ කරමින් සිටි අතර දුම්පානයත් , කරාටේ ඉගෙනීමත් ඉන් ප්රධාන තැනක් ඉසිලීය.
මා ඔබට ප්රදී ගැන කීවාදැයි මට හරියටම මතක නැතත් තැන් දෙක තුනක හැරුන විට ඒ නම සඳහන් නොකිරීම ත් මෙම කතාන්දරයේ ප්රධාන මාතෘකාව “ප්රදී“ වීමත් ඔබගේ සිත විමතියට පත් කරන්නට ඇත. අනූෂාගෙන් කතාන්දරය ඇරඹිය ද ඇත්තෙන්ම මෙය ප්රදී ගේ කතාව බව මට ද අමතක වී යාමට තිබුනි.
ප්රදී යනු තලෙළු පැහැති , ඉතා සිහින් සිරුරැති මීෂාගේ සිත වඩා පැහැර නොගත් මීෂාගේ මිතුරු ලැයිස්තුවේ නිතර සඳහන් නොවූ නමුත් ඔහුගේ පන්තියේම සිටි කෙල්ලෙකි. ඇයද පෙම් සබධතාවයක පැටලී සිට ඉන් විරහව පමණක් උරුම කර ගත්තියක වූව ද මීෂා මෙන් විරහවේ ගිලී සිටිනු දැකිය නොහැකි විය.
විවාහයෙන් දුරස් වූ දෙමාපියන්ගෙන් පියාගේ පාර්ශවය තෝරා ගත් ප්රදී , ඇඳුමෙන් පැලදුමෙන් මෙන්ම හැසිරීමෙන්ද විශේෂ වූවාය .
දිගු කලිසමින් නිතර සැරසුනු ඇය , ගිටාර් වාදනයට සමත්කමක් දැක්වූවාය. මව හා පියා ගේ විතැන් වීම පිළිබඳව එතරම් තැකීමක් නොකල අයෙකු ලෙස සතුටින් හැසිරුනාය.
දහවල වෙන විටත් පරිසරයේ තුරන් නොවූ මීදුම් පරිසරය මීෂාගේ විරහ සිත මෙනි. හිතේ මීදුම් වැඩි කරමින් “අනූෂා“ පැමිණ තිබුනේ ඇය වෙත ඔහු එවූ ලියුම් මිටියක් ද ඇයට ඔහු විසින් ලබා දුන් පුංචි පුංචි අනම් මනම් සියල්ල ද ඔතා ගෙනය.
“ මේවා ඔයාට මම දුන්නු ලියුම් එක්කම පුච්චල දාන්න “
කිසිත් නොකියා ඈ දුන් සියල්ල ලබා ගත් ඔහු තමන්ට පිටු පා යන ඇගේ දිගට ගොතන ලද මහත කොණ්ඩ කැරැල්ල, තාලෙට ඇගේම නිතඹේ වැදෙන අයුරු බලා සිටියේ අරමුණකින් තොරව නමුත් ආදරණීය සිතකිනි. ඇගේ දිගු කොණ්ඩ කැරුල්ලනේ ඇද ඇයව තරහ ගස්සන අයුරුත් , බොරු තරහක් මවා ගනිමින් ඇගේ සුමුදු අත්ලෙන් ලැබෙන පහරවල් විදින අයුරුත් මැවී නොපෙනී ගියේ ඇගේ ගමනද ඔහුගේ දෙනෙතින් වහන් වී ගොඩනැගිලි අතර අතුරුදහන් වී ගිය ලෙසිනි. ඇය එක් වරක් හෝ හැරී නොබැලීම ඔහු සිත තවත් පාරන්නට ඇත.
ලියුම් මිටිය දෙස දෙවරක් නොබැලූ ඔහු යමින් ගමන් සිගරට්ටු පහක් මිලට ගෙන උඩ සාක්කුවේ දා ගත්තේ ලියුම් පුච්චන්නට අවශ්ය ශක්තිය ලබා ගන්නට මෙනි.
නමුත් ඔහුගේ මිතුරු කැළ විසින් සාක්කුවට ඔබා ගත් සිගරට්ටු සාක්කුව තුළ තිබිය දීම කුඩු බවට පත් කරන්නට තරම් කාරුණික හදවත් ඇත්තෝ වූහ.
“ සෝ..භා.......ව දේ ............. මෙපුර
සිරි විසිතුරු බලනු මිතුර මඟ පියකරු වූ පාරේ එක පෙළට ගමන් කරන ගමන් එකිනෙකා කරට ද මීෂාගේ කර ටද අතදා ගත් මිතුරෝ සිවුදෙන විනෝදයෙන් මෙන් හැසිරෙන්නට වූයේ මීෂාගේ මීදුම් සිතේ මීදුම යන්නට පායන හිරු කිරණක් වන්නට මෙනි.
“ ඉන්න දියන් බන් පාඩුවේ “ තම උරහිස මත වැටුනු මිතුරාගේ දකුණත ගසා දැමූ මීෂා පැවසුවේ නොපහන් සිතිනි.
මිතුරන් සිවු දෙනාත් මුණ ඇද වුනු ඉදිච්චි ගොරක ගෙඩියක් කර ගත් මීෂාත් නගරය වෙත සේන්දු වී තිබුණු අතර ප්රදී සහ ඇගේ යහළුවන් කිහිපදෙනෙකු දැක ඇය හා කතා කිරිමට නැවතුනහ.
ප්රදී හා යෙහෙළියන් සිටින තැනට ආසන්නයේ ම සිටි කොලු රැළෙහි ඇස් වලින් සහ කතා වලින් හිරිහැර ලබමින් සිටි ප්රදී ට ද තමන්ගේ පන්තියේ සහෝදරයන්ගේ පැමිණීම හිතට ගෙන දුන්නේ අස්වැසිල්ලකි.
“ කොහද බන් මේ අතන මෙතන රස්තියාදු වෙන්නෙ , ගෙවල් වල ගියානම් නරකයි උඹලටත් ඈහ් “
“ ගෙවල් වල යන්න තමා ඉන්නේ. මොකද තොපි හිතුවැයි අපි මෙතන පැල වෙන්න ආවැයි කියලා , එහෙනම් ඔයාල යන්න .දැන් මේ ගොල්ලෙ ඉන්නවනේ “
තම මිතුරියන් දෙසට හැරී එසේ පැවසූ ප්රදී. කිසිවක් නොදොඩා නිහඬව සිටින මිෂා දෙස බැලුවාය.
මීෂා සිටියේ වෙනම ලෝකයකය. මිතුරන් සමඟින් ද නොපහන් සිතින් පසු වූ ඔහු තම සාක්කුවේ ඇති , කුඩුකර දැමූ සිගරට් කුඩු සහ කොට බිමට හැලීමට සූදානම් වූවා පමණි.
චටාස් හඬින් ඔහුගේ කණ හරහා වැදුනේ සුමුදු ගැහැණු අතක දරුණු පහරකි........
ප්රදී ...........
----------------------------
“ ප්රදී ප්රදී ප්රදී .......... නෙමෙයි. අනේ මට කියන්නකෝ අනූෂා ඇයි මෙච්චර හොඳ ඔයාව දාලා ගියේ කියලා.“
“ ඇයි ඔයාට දැන ගන්න ඕනි නැද්ද, කවුද මට කම්මුලට ගැහුවේ , ඇයි ගැහුවෙ කියලා.“
“ ඒක පස්සෙ කියන්න,ඉස්සෙල්ලා අහපු දේට ඉස්සෙල්ලා උත්තර කියන්න. ඇ...යි.......... අනූ.....ෂා... ඔයා ව දාලා...ගියේ “
තරමක් බර කර විරාමයන් සහිතව නැවතත් ඇසූ පැනයෙන් ගැලවී යාමට නොහැකි බැව් දැන ගත් මීෂා මට උත්තර බදින්නට කලියෙන් මා හිස තිබූ ඔහුගේ දකුණු අතත් , මා උරහිස මත තිබූ ඔහුගේ වමතත් ගෙන මෙතෙක් වෙලා ඔහුගේ උකුලේ සතපා තිබූ මගේ හිස තරහෙන් මෙන් තල්ලු කර දැමූ බැවින් ඔහු පය පාමුල වැතිර සිටි තැනින් නැගිට ඔහුගේ උණුසුමින් මිදී ඔහුට මුහුණ ලා සිට ගත්තේ , ඔහුගේ මුහුණ දෙස කෙළින්ම බලා පිලිතුර ම අපේක්ෂාවෙන් පසු වූයෙමි.
ටික වේලාවක් එසේ සිටි මා දෙස බලා සිටි ඔහු නැවතත් දොඩමලු වූවා නොව , මාගේ දරුණු බැල්මෙන් මිදීමට නොහැකිව දොඩමලු වන්නට සිදු වුවා සේය.
“ එයා ඊළඟට යාළු වුනේ මගේ ම යාළුවෙක් එක්ක. ඌ තමා මට කීවේ.... මාත් එක්ක කරන්න බැරි වුනු ගොඩක් දේවල් එයා එක්ක කරල. මගෙන් නොලැබුනු දේවල් හොයාන තමා එයා ගිහින් තියෙන්නේ. “
“ ඉස්කෝලෙ කාලෙ දී ඔච්චර දේවල් හිතනවද අනේ “
“ මම අතින් විතරක් අල්ලන් සැනසෙද්දි ,එයා හිතන්න ඇති මම ගේ කොල්ලෙක් කියලා “
“ඔයාගේ කතාවෙ ඇත්තක් නැත්තෙම නෑ. මට මතකයි දවසක් අපේ ඉස්කෝලෙ කට කැඩිච්චි කතා කියන සර් කෙනෙක් අලුතින් ආපු සර්ල දෙන්නෙක්ට කීව කතාවක්. එයා කීවා කෙල්ලොන්ට දේවල් දුන්නෙ නැති වුනොත් උන් අපි ළඟ රැදෙන්නෑ බන් පිට යනවා කියලා ................. ඒත් අනේ ..... අනේ මන්දා. ඔයාට එයාගේ කම්මුලක් වත් ඉඹින්න තිබ්බා. “
“ ප්රදී ගැන ඉතිරු ටිකත් කියන්න ද ?“
“ අනේ එපා...ඒ ටික අපි ඊළඟ කොටසට ලියමු. මට මේ ලීව ටික ගැන තව ගොඩක් හිතන්න තියනවා... “
No comments:
Post a Comment